Har bir bolaning ta’lim olish imkoniyati uning yashash manzili yoki alohida ta’lim ehtiyojlari bilan cheklanmasligi kerak. Shu jihatdan nodavlat maktablarda korreksion sinflar tashkil etilishi bolalarning sifatli ta’lim va zarur pedagogik yordamdan foydalanish imkoniyatlarini kengaytiradi.
Yangi qarorga muvofiq, alohida ta’lim ehtiyojlari bo‘lgan bolalar uchun ehtiyoj mavjud tumanlardagi nodavlat maktablarda korreksion sinflar ochiladi. Ushbu sinflarda tahsil olayotgan bolalar uchun davlat tomonidan subsidiya ajratiladi. Mablag‘ bevosita ta’lim tashkilotiga yo‘naltiriladi, ota-onalardan esa ta’lim xizmati uchun to‘lov undirilmaydi.
Natijada bolalar oilasidan uzoqlashmagan holda, yashash joyiga yaqin hududda ta’lim olish va zarur pedagogik ko‘makdan foydalanish imkoniga ega bo‘ladi.

