Angor tumanida M-39 xalqaro avtomobil yo‘li bo‘yida xizmat ko‘rsatish, savdo va turizm infratuzilmasini kengaytirishga qaratilgan loyihalar amalga oshirilmoqda. Surxondaryo viloyati hokimi Ulug‘bek Qosimov hududga tashrifi davomida avtomobil yo‘lining 27-kilometrida barpo etilayotgan zamonaviy bolalar bog‘chasi hamda maishiy xizmat ko‘rsatish majmuasi loyihalari bilan tanishdi.
Shuningdek, to‘yxona va xizmat ko‘rsatish majmuasini o‘z ichiga olgan “Diyorbek” to‘yxonasining ochilish marosimi bo‘lib o‘tdi. Unda 10 nafar bolaning xatna to‘yi o‘tkazilib, ularga sovg‘alar topshirildi. Tashrif davomida “Angor Agro Star” loyihasida olib borilayotgan ishlar ham ko‘zdan kechirildi. Sayyohlarga xizmat ko‘rsatish imkoniyatlarini kengaytirishga mo‘ljallangan “Turizm sayyohgohi 24/7” loyihasining qurilish jarayoni ham nazorat qilindi.
Mas’ullarga obyektlarni belgilangan muddatda va sifatli yakunlash, M-39 yo‘li bo‘yidagi xizmatlar ko‘lamini kengaytirish hamda tumanning turistik salohiyatidan samarali foydalanish bo‘yicha vazifalar belgilandi.
