Бугун Бухоро давлат педагогика институтида Олий Мажлис Сенати аъзоси, Ўзбекистон Миллий ахборот агентлиги бош директори Абдусаид Кўчимов иштирокида талабаларга навбатдаги «Мустақиллик дарси» ўтказилди.
Тадбирда юртимиз мустақиллигининг тарихий аҳамияти, тинчлик ва осойишталикнинг қадр-қиммати, бугунги тараққиёт ва ёшларнинг Ватан олдидаги масъулияти ҳақида сўз юритилди.
Шу ўринда бир муҳим сана ёдга олинди. 2016 йил 8 сентябрь куни Ўзбекистон Республикаси Президенти Шавкат Мирзиёев Олий Мажлис палаталарининг қўшма йиғилишида Ўзбекистон Республикаси Президенти вазифасини бажарувчи этиб тайинланган эди.
Бу сана — мамлакатимиз ҳаётида янги сиёсий давр бошланган, «Янги Ўзбекистон» ғояси сари илк қадамлар ташланган тарихий кунлардан бири сифатида алоҳида аҳамиятга эга.
Мустақиллик дарсида, шунингдек, тинчликни асраш, уни кўз қорачиғидек қадрлаш ва ёш авлодга етказиш ҳар биримизнинг муқаддас бурчимиз экани таъкидланди.
