Prezidentimiz huzurida 2025-yil 26-dekabr kuni Surxondaryo viloyatini ijtimoiy-iqtisodiy rivojlantirish vazifalarining ijrosi hamda kelgusidagi rejalar bo‘yicha o‘tkazilgan taqdimotda davlatimiz rahbari tomonidan vazirliklar va viloyat hokimligiga aniq vazifalar belgilab berildi. Shuningdek, Surxondaryo viloyatining mavjud salohiyati va imkoniyatlaridan to‘liq foydalanishga qaratilgan qo‘shimcha chora-tadbirlar to‘g‘risida qaror imzolandi.
Viloyat hokimi Ulug‘bek Qosimov mazkur qarorda belgilangan vazifalar hamda mahallalarda infratuzilmani rivojlantirishga qaratilgan loyihalar taqdimoti bilan tanishdi. Mas’ul tashkilotlar tomonidan soha, tarmoq va yo‘nalishlar kesimida rejalar taqdimot qilindi, amalga oshirilayotgan va boshlanishi rejalashtirilgan loyihalar, shuningdek, Jahon banki va Islom taraqqiyot banki ishtirokidagi infratuzilma loyihalari ijrosi yuzasidan axborot berildi.
Mutasaddilarga loyihalarni takomillashtirish, tasdiqdan o‘tganlarini o‘z vaqtida boshlash hamda amalga oshirilayotgan ishlar sur’atini jadallashtirish bo‘yicha aniq topshiriqlar berildi.
