Sho‘rchi tumanida tashabbuskor tadbirkor Muhriddin Abdullayev tomonidan barpo etilgan zamonaviy xizmat ko‘rsatish maskani o‘z faoliyatini boshladi. Loyihaning eng quvonarli jihati — bu yerda 25 nafar yoshlar doimiy ish o‘rniga ega bo‘ldi.
Mazkur maskan aholiga yuqori darajadagi xizmat ko‘rsatish, milliy va xorijiy taomlarni tayyorlab taqdim etish, mehmonlar uchun qulay va shinam muhit yaratishni o‘z oldiga maqsad qilib qo‘ygan. Oilaviy yig‘ilishlar, turli tadbirlar va uchrashuvlar o‘tkazish uchun maxsus zallar, malakali oshpazlar va sifatli servis tizimi ham joriy etilgan.
Shuningdek, bolajonlar uchun mo‘ljallangan o‘yin maydonchasining mavjudligi ham ushbu maskanni aholiga yanada qulay va ma’qul joyga aylantirmoqda. Ushbu tashabbus nafaqat sifatli xizmat, balki yoshlar bandligini ta’minlash orqali tumanda ijtimoiy-iqtisodiy rivojlanishga munosib hissa qo‘shmoqda.
