Termiz davlat universiteti viloyatimiz ma’naviy-ma’rifiy hayotida o‘ziga xos o‘rin egallab, ushbu sohada faoliyat yuritayotgan yetakchi ta’lim muassasalaridan biri sifatida e’tirof etilmoqda. Universitet professor-o‘qituvchilari viloyat miqyosida tashkil etilayotgan ko‘plab ma’naviy-ma’rifiy tadbirlarda muntazam ishtirok etib, yoshlarning ijtimoiy faolligini oshirish, ularni to‘g‘ri kasb tanlashga yo‘nal-tirish borasida samarali mehnat qilmoqda.
Xususan, “Dolzarb 90 kunlik” doirasida ham ana shunday muhim tashabbuslar davom etayotir. Viloyat hokimligi hamda Maktabgacha va maktab ta’limi viloyat boshqarmasi hamkorligida Sariosiyo tumanidagi 1-son politexnikumda “Karera kuni” tadbiri tashkil etildi. Uchrashuvda tuman miqyosidagi turli idoralar vakillari bilan birga universitetning tarix fakulteti professor-o‘qituvchilari ham qatnashdi.
So‘zga chiqqanlar tomonidan Termiz davlat universitetida yaratilgan ta’lim va tarbiya muhitining afzalliklari, yoshlarni kasb tanlashga to‘g‘ri yo‘naltirish, ularga mustahkam hayotiy pozitsiyani shakllantirishdagi muhim jihatlar haqida fikr bildirildi. Yakunda barcha yoshlarga kelajakdagi kasbiy faoliyatlarida muvaffaqiyat, izlanishdan to‘xtamaslik va o‘z salohiyatini to‘la ro‘yobga chiqarishda omadlar tilandi.
B. Turdiboyev,
TerDU Falsafa kafedrasi mudiri,
f.f.b.f.d. (PhD)
