Maʼlumki, O‘zbekiston va Afg‘oniston o‘rtasidagi iqtisodiy hamda gumanitar hamkorlikka alohida e’tibor qaratilib, mintaqaviy barqarorlik va taraqqiyotni ta’minlash borasida qator loyihalar amalga oshirilmoqda. Shu maqsadda Surxondaryo viloyati hokimi Ulug‘bek Qosimov Qatarning Doha shahrida joylashgan AQSHning Afg‘onistondagi diplomatik missiyasining iqtisodiy hamkorlik bo‘yicha mas’ul vakili Adam Leff boshchiligidagi delegatsiyani qabul qildi.
Uchrashuvda Afg‘onistonda iqtisodiy barqarorlik va ijtimoiy taraqqiyotni ta’minlash, kichik va o‘rta biznesni qo‘llab-quvvatlash, shuningdek, afg‘on tadbirkorlarining Surxondaryo viloyati orqali xalqaro bozorlarga chiqishi uchun qulay shart-sharoitlar yaratish masalalari muhokama etildi. Jumladan, “Termiz xalqaro savdo markazi” va “Termiz Cargo Сentre” kabi zamonaviy logistika va savdo infratuzilmalari ushbu maqsadlarga erishishda muhim ahamiyat kasb etishi ta’kidlandi.
Yakunda tomonlar o‘zaro hamkorlikni yanada mustahkamlash hamda boshqa sohalarda istiqbolli loyihalarni amalga oshirish borasida kelishib oldilar.
