Yerni boqsang…

Bugungi kunda ish izlab sarson bo‘lishga hojat yo‘q. Shunchaki, o‘zingizdagi imkondan foydalansangiz, pulning o‘zi oqib kelaveradi. Ya’ni xonadoningizdagi tomorqadan unumli foydalanib, ekin-tikin qilib ham daromad ko‘rish mumkinligini xalqimiz yaxshi biladi. Ishsizga ish, ishliga qo‘shimcha daromad bo‘ladigan bu jihat oilani qishloq xo‘jaligi mahsulotlari bilan ta’minlab, qozonini qaynatib, ro‘zg‘orni tebratishga ham xizmat qilayotgani quvonarli.
Sherobod tumani “G‘o‘rin-gilambob” va “Kattabog” mahallalarida ham tomorqa yer maydonlaridan samarali foydalanish bo‘yicha keng qamrovli ishlar olib borilmoqda. Ushbu mahalla xonadonlarida issiqxonalar tashkil etilib, u yerda pomidor, bodring, bulg‘or qalampiri ko‘chatlari ekilgan. Avvalo, ayollar o‘zlari egallab turgan tomorqalardan foydalanib, yetishtirgan hosilni oilasiga, ortganini esa bozorga chiqarishmoqda. Qarabsizki, bozorlarimiz ham arzon va sifatli mahsulotlar bilan to‘lgan.