Mamlakatimizda o‘tgan qisqa davr boshqa sohalar qatori gaz ta’minoti sohasi ham tubdan o‘zgardi. Xususan, sohani yanada rivojlantirish maqsadida olib borilgan izchil islohotlar qator muammolarning oldini olish, sifat samaradorligini oshirishda dasturulamal bo‘lib xizmat qildi. Ayniqsa, tizimga raqamli iqtisodiyotning kirib kelishi inson omilini qisqartirish orqali shaffoflikni ta’minlashda muhim ahamiyat kasb etdi.
Darhaqiqat, viloyatimizning ayrim hududlarida gaz tarmog‘iga ulanishga ehtiyoji bor xonadonlar ko‘plab topiladi. Biroq bu gaz tarmog‘iga ulanish uchun pora berish kerak degani emas. Afsuski, davlat mulkini sotib, o‘z kasbiga sovuqqon qarab, suiste’mol qilayotgan ba’zi poraxo‘r rahbarlar ham oramizda uchrab turadi.
Jumladan, Surxondaryoda gaz tarmog‘iga ulanishga ruxsat berishi uchun tadbirkordan 700 AQSH dollari talab qilgan “Termizshahargaz” gaz ta’minoti bo‘limi boshlig‘i ushlandi. Bu haqda Bosh prokuratura huzuridagi departament xabar bergan. Qayd etilishicha, Bosh prokuratura huzuridagi departamentning Termiz shahar bo‘limi, prokuratura va IIB xodimlari hamkorligida tadbirkorlik subyektlarining huquqlarini himoya qilish yuzasidan tezkor tadbir o‘tkazilgan.
Unda “Termizshahargaz” gaz ta’minoti bo‘limi boshlig‘i F.H. “M.M.” oilaviy korxonasining umumiy ovqatlanish shoxobchasida gaz nuqtalarini tashkil etish va ularni tarmoqqa ulashga ruxsat hamda texnik shart xulosasini berishi evaziga 700 AQSH dollari va loyiha hujjatlarini arzon narxlarda tayyorlab berishi uchun yana 2 million so‘m talab qilib, ushbu pullar hisobidan 5 million so‘mni olgan vaqtida ashyoviy dalillar bilan ushlangan.
Mazkur holat yuzasidan Jinoyat kodeksining 210-moddasi (pora olish) bilan jinoyat ishi qo‘zg‘atilib, tergov harakatlari o‘tkazilmoqda.
D.Qo‘zimurotova
