Yoshlarga imkon berilsa…

Qo‘lida hunari bo‘lsa-yu, undan foydalanishga imkoni bo‘lmasa, bundan yomoni bo‘lmasa kerak. Yurtimizda esa inson o‘zining haq-huquqlarini, imtiyoz va imkoniyatlarini bilsa, imkonsizlik haqida gap bo‘lishi mumkin emas. Termiz tumanilik Azamat Husanovning ham qo‘lida guldek hunari bor. Qo‘liga qaychi-taroq tushsa, mijozining ko‘nglini shodlantirmay, ishini bitkazmaydi.
Ammo, bu faqat qaychi-taroq bilan amalga oshadigan ish emas. Azamat uyida sartaroshxona ochib, ishlab kelmoqda. Ammo, qo‘shimcha asbob-uskunalari bo‘lsa, sartarosh yigit bundan-da ko‘proq ishga qodir ekanini ko‘rsata oladi. Mahallasidagi yoshlar yetakchisi esa Azamatning qiziqishlarini payqab, “Yoshlar daftari” jamgʻarmasi orqali zarur asbob-uskunalar olib berishga muvaffaq bo‘ldi.
Ana shundan keyin, sartarosh yigitning zavqi toshib, katta qiziqish bilan ishga sho‘ng‘idi. Hozirgi kunda yosh sartaroshning 5 nafar shogirdi bor. Azamat kelajakda ishini kengaytirib oʻziga oʻxshagan yoshlarni ish bilan taʼminlashni maqsad qilgan. Hech bir yosh imkonsizlikdan qiynalib, aro yo‘lda qolmasligini istaydi.