To‘maris mard va jasur ayol timsoli. Uning jasorati tillarga doston bo‘lib, asrlardan-asrlarga, tillardan-tillarga o‘tib, ayol matonatini namoyon etib, qalbimizga faxru iftixor tuyg‘ularini mavjlantirib keladi. To‘maris siyrati-yu fitratini bugun ham ana shunday gavdalantirish maqsadida san’atimiz ustalari bor mahorat va bilimlarini ishga solib, tarixni jonlantirishayotgani esa tomoshabin ma’naviy saviyasini oshiradi.
Surxondaryo viloyati musiqali drama teatrining ijodiy jamoasi To‘maris spektaklini tomoshabinlar hukmiga havola etishdi. Spektakl tomoshabinlar tomonidan ijobiy kutib olindi va ular o‘z taassurotlarini keng ommaga ma’lum qilib, barchaning qiziqishini oshirishga xizmat qilayotir.
Termiz iqtisodiyot va servis universiteti talabalari universitet homiyligi asosida teatrda bo‘lishdi va To‘maris spektaklini tomosha qilib, bir olam taassurotlar olishdi.
