Daromad solig‘i qaytarib beriladi

Mo‘may daromad topish uchun har bir tadbirkor o‘z ishini kengaytiradi. Bu qo‘shimcha ish kuchiga ehtiyoj tug‘diradi degani. Har bir ishchi kuchi esa soliq to‘lovlarida ham sezilarli o‘zgarishlarni keltirib chiqaradi. Tadbirkorlarga yengillik berish maqsadida O‘zbekiston Respublikasi Prezidentining “Faol ishbilarmonlik muhitini shakllantirishni yanada rag‘batlantirish, soliq majburiyatini bajarishda aholi tomonidan ortiqcha xarajatlarga yo‘l qo‘ymaslik hamda qo‘shimcha ish o‘rinlarini yaratishga doir chora-tadbirlar to‘g‘risida”gi qarori qabul qilindi. Qarorga ko‘ra 2023-yil 1-iyuldan 2024-yil 1-iyulgacha issiqxonaga ixtisoslashgan yer maydoni 25 sotixdan koʻp boʻlgan tadbirkorlar tomonidan ishchilarining mehnatga haq toʻlash tarzidagi daromadlari boʻyicha toʻlangan jismoniy shaxslardan olinadigan daromad soligʻini bir vaqtning oʻzida tadbirkorlarga qaytarib berish tartibi joriy etildi.
Bunda har bir 5 sotix yer maydoni uchun oyiga kamida 1 nafar ishchining bandligi ta’minlanganda, har bir ishchi uchun oyiga mehnatga haq to‘lash tarzidagi daromad mehnatga haq to‘lashning eng kam miqdorining 1 baravaridan kam bo‘lmagan miqdorda belgilanganda va issiqxonaga ixtisoslashgan tadbirkorlik subyektlari tomonidan issiqxona faoliyati bo‘yicha olgan daromadlari joriy hisobot (soliq) davri yakunlari bo‘yicha jami daromadning kamida 60 foizini tashkil etganda daromad solig‘i qaytarib beriladi.