Yurtimizda har bir inson, ijtimoiy kelib chiqishi, imkoniyatlaridan qat’iy nazar e’tibor va g‘amxo‘rlik ostida, qo‘llab-quvvatlovda. Imkoniyati cheklanganligi, nogironligi bois ajratib qo‘yilmaydi, balki ular ham jamiyatning teng huquqli a’zi sifatida turli jabhalarda mehnat qilishmoqda, ta’lim-tarbiya olishmoqda. Ularga o‘qishda, ishda qulaylik yaratish maqsadida yengilliklar, munosib shart-sharoitlar yaratilgani ham e’tirof etishga arziydi. O‘zbekiston karlar jamiyati tashkil topganligining 95 yilligi munosabati bilan Qumqo‘rg‘on tumanida “Jannat bog‘i” shiori ostida tashkil etilgan bayram tadbirida ham ularning mehnati e’tirof etildi, minnatdorlik tuyg‘ulari izhor etildi.
Ayniqsa, tadbirda O‘zbekiston karlar jamiyati prezidenti Go‘zal Shodiyeva, Ijtimoiy himoya milliy agentligining Surxondaryo viloyati boshqarmasi boshlig‘i Muhiddin Tog‘ayevlarning ishtiroki, samimiy tilaklari Surxondaryo viloyatining barcha tumanlaridan ishtirok etgan 670 nafar karlar jamiyati a’zolari qalbini nurga to‘ldirdi. Qolaversa, so‘zga chiqqanlar mamlakatimizda nogironligi bo‘lgan fuqarolarni ijtimoiy qo‘llab-quvvatlash, ularning turmush sharoitini yaxshilash masalasiga alohida e’tibor qaratilayotgani, davlatimiz rahbarining g‘amxo‘rligi mehrga, e’tiborga muhtoj insonlar hayotida juda katta o‘zgarish bo‘lganini ta’kidlashdi.
Tadbir so‘nggida bayram munosabati bilan barcha karlar jamiyati a’zolariga esdalik sovg‘alari topshirildi.
