2024-yil 1-yanvardan…

Yangi yildan umidlarimiz katta. Har bir sohada islohotlar nasimi yelib, ulardan o‘zgarishlar, yangilanishlar kutamiz. Bu har birimizning hayotimizda o‘ziga xos iz qoldirishini niyat qilamiz. Shu jihatdan, yangi yilning 1-yanvaridan qanday o‘zgarish va yangilanishlar bo‘lishi, qanday qonun va qonunosti hujjatlar, qaror va farmoyishlar kuchga kirishi har birimiz uchun muhimdir.
Aytish joizki, 1-yanvardan xotin-qizlarning haq to‘lanadigan jamoat ishlari asosida fuqarolarning o‘zini o‘zi boshqarish organlarida ish yurituvchi bo‘lib ishlashiga 11 oygacha muddatga ruxsat etiladi. Tashkilot (ish beruvchi) tomonidan ish o‘rinlari zaxiraga qo‘yiladigan ijtimoiy himoyaga muhtoj, ish topishda qiynalayotgan va mehnat bozorida teng shartlarda raqobatlasha olmaydigan shaxslar toifalariga oilaviy (maishiy) zo‘ravonlik natijasida jabrlanganlar ham kiritiladi.
Fuqarolik ishlari bo‘yicha tumanlararo sudlarda oilaviy nizolarni ko‘rishga ixtisoslashgan sudyalar korpusi shakllantiriladi. 2024-yil 1-fevraldan tajriba tariqasida fuqarolik ishlari bo‘yicha Samarqand shahar, Namangan tumanlararo va Mirzo Ulug‘bek tumanlararo sudlarining 2 nafardan sudyasini oilaviy nizolarni ko‘rish bo‘yicha ixtisoslashtirgan holda ushbu sudlarda “Oila sudyalari” tashkil etiladi.