Yoshlar gulxan atrofida jam boʻlishdi

Angor tumani markazida o‘rnatilgan bayram archasi odamlar bilan gavjum. Bir so‘z bilan aytganda, tuman ahli bu yerda bo‘lib, munosib xordiq chiqarishayotir. Yangi yil bayrami tadbirlariga hamohang tarzda archaga yaqin nuqtada gulxan yoqildi. Ushbu gulxan atrofida yoshlar bilan uchrashuv bo‘lib o‘tdi. Uchrashuvda tuman hokimi Qosim Mardonov va sektor rahbarlari ishtirok etdi.
Tuman rahbari yosh avlod vakillari bilan suhbatlashib, ularga bilim olishlari, kasb-hunar egallashlari borasida o‘zining tavsiya va takliflarini berdi. Samimiy va dildan kechgan suhbatda yoshlar ham o‘zlarining dilidagi so‘zlarini to‘kib sochdilar. Muammolar, rejalar, loyiha va g‘oyalar o‘rtaga tashlandi. Muhokamalar qizigandan qizidi. Shundan soʻng, yoshlar oʻz iqtidorlarini namoyish etishdi. Kuy va qo‘shiqlar, she’rlar esa davrаga o‘zgacha shukuh bag‘ishladi.
Gulxan atrofida yoshlarni birlashtirgan bu oqshom barchada katta taassurot qoldirdi.