Vatan himoyachilar kuniga ham oz qoldi. Ammo, qalbimizga vatanparvarlik hissini singdirish uchun ushbu sanani kutib o‘tirmaymiz. Balki turli tadbirlar, uchrashuvlar, musobaqalar orqali ham, oddiygina film tomosha qilib ham qalbimizda vatanga bo‘lgan hislarimizni yanada alanga oldirishimiz mumkin. Oʻzbekiston Respublikasi Qurolli Kuchlari tashkil etilganligining 32 yilligi hamda Vatan himoyachilari kuni arafasida viloyatimiz umumtaʼlim maktablarida qator harbiy-vatanparvarlik va maʼnaviy-maʼrifiy tadbirlar oʻtkazilayotganining sababi ham shundan.
Termiz shahridagi 13-sonli hamda 26-sonli umumtaʼlim maktablarida DXX Chegara qoʻshinlari “Yosh chegarachilar” harbiy-akademik litseyi oʻquvchilari bilan uchrashuv oʻtkazildi. Harbiy libosi oʻziga yarashib turgan yosh oʻgʻlonlar oʻzlari 10-sinfgacha tahsil olgan maktabda oʻquvchilarga DXX Chegara qoʻshinlari “Yosh chegarachilar” harbiy-akademik litseyi, unda yaratilgan sharoitlar, oʻqishga qabul qilinish shartlari haqida so‘zlab berishdi.
Mana shunday uchrashuvlarning tashkil etilishi yoshlarni Vatanga sadoqat ruhida tarbiyalash, harbiylikka qiziqtirish, ularga yurt oldidagi farzandlik burchini anglatishi bilan ahamiyatlidir.
