“Turk tili markazi” tashkil etiladi

Bugun o‘z kelajagiga befarq bo‘lmagan har bir yosh chet tillarini o‘rganishga kirishgan. To‘g‘ri-da, kim ham o‘zi uchun imkoniyatlar eshigini ochishni istamaydi deysiz. Ingliz, nemis, fransuz, turk tillarini bilish, o‘sha tillarda so‘zlashuvchi davlatlarda o‘qish, ishlash imkonini beradi. Til o‘rganish uchun malakali va ishonchli o‘quv markazlariga borish o‘rganishni tezlashtiradi.
Termiz iqtisodiyot va servis universiteti vakillari Turkiyaga tashrifi davomida Hacettepe universitetining Turk tili o‘qitish markazida ham bo‘lishdi. Delegatsiya aʼzolari Hacettepe universitetining Turk va xorijiy tillar o‘qitish markazi direktori professor Dr. Mustafo Durmus va Turkshunoslik ilmiy tadqiqotlar instituti direktori Yunus Koc bilan muzokaralar olib bordi.
Jarayonda 2024-yil yanvar oyidan Termiz iqtisodiyot va servis universitetida “Turk tili markazi” tashkil etish bo‘yicha kelishuvlar amalga oshirildi. Mazkur til markazida Hacettepe universitetining yetakchi mutaxassislari, filolog olimlar dars oְ’tadi. Markazda o‘qib, turk tilini yaxshi o‘zlashtirgan talabalar bahorgi semestrda Hacettepe universitetida o‘qish imkoniyatiga ega bo‘lishadi.