Har bir insonga hayoti davomida huquqiy maslahatga ehtiyoj tug‘iladi. Ayniqsa, xotin-qizlar va bolalar o‘z huquqlarini har doim ham bilavermaydi. Mahalla faollari, ya’ni xotin-qizlar bo‘yicha mutaxassis hamda yoshlar yetakchilari esa ular bilan doimiy ishlashini hisobga olsak, xotin-qizlar va yoshlar ayni mutaxassislarning tavsiyasi, maslahatlariga tayanishadi. Kerakli maslahatni berish uchun esa yoshlar yetakchisi va xotin-qizlar mutaxassisining o‘zi huquqiy bilimlardan xabardor bo‘lmog‘i lozim.
O‘zbekiston Respublikasining “Xotin-qizlar va bolalar huquqlari, erkinliklari hamda qonuniy manfaatlarini ishonchli himoya qilish tizimi yanada takomillashtirilishi munosabati bilan O‘zbekiston Respublikasining ayrim qonun hujjatlariga o‘zgartish va qo‘shimchalar kiritish to‘g‘risida”gi O‘RQ-829-son Qonuni mazmun-mohiyati bo‘yicha hamda har bir uyga bepul huquqiy maslahat bilan aksiyasi doirasida Qiziriq tuman adliya bo‘limi va oila va xotin-qizlar bo‘limi tomonidan tumandagi pedagogika kolleji binosida tumandagi mahalla xotin-qizlar faollari, yoshlar yetakchilari uchun o‘quv-seminar bo‘lib o‘tdi.
Seminar davomida yurtimizda qabul qilingan qonun hamda qarorlar, farmoyishlarning mazmun-mohiyati tushuntirildi. Huquqiy bilimlari oshirildi. Umid qilamizki, mahalla eshigini qoqib, huquqiy yordam so‘rab kelgan har bir fuqaroga kerakli maslahat berilib, yo‘l-yo‘riqlar ko‘rsatiladi.
