Бош саҳифа / Жамият / Кечиккан ҳавас

Кечиккан ҳавас

Қизалоқ учун бугун байрам. Негаки, ойиси анчадан буён айтиб юрган ваъдасини бугун бажарадиган кун.

— Ойижон, ўша қизил боғли туфлини олиб берасиз-а?

— Албатта, қизим, ўша туфли сенга роса ярашади-да.

— Ойижон, агар ўша туфли сотилиб кетган бўлсачи…

— Йўқ, қизим, асло сотилмайди. Чунки у туфли айнан сен учун яратилган ва ажойиб қутида ўз эгасини кутаяпти.

Она-бола йўлда кетаркан, узоқ суҳбатлашди. Ҳар доим тезда босиб ўтиладиган манзилнинг шу тобда негадир охири кўринмасди. Орзулар эса сабрнинг беадоғ йўлларида синашта бўларди. Йўл-йўлакай катта ойнали магазинда чиройли, қўнғироқ сочли қўғирчоқни кўришгунларича шунақа бўлди. Қизалоқ ўша қўғирчоққа маҳлиё бўлди-қолди.

— Ойижон, оёқ кийимини бошқа сафар олақолайлик, — кўзларини жовдиратиб сўради қизалоқ.

— Ахир, кийгулик оёқ кийиминг бўлмаса…

— Илтимооос…

Қизининг раъйини қайтаролмай:

— Ҳа, олдин кўрайлик-чи нархини, — деди она.

Магазинга кириб, қўғирчоқнинг нархини билишди. Ёнларида эса унга етарли маблағ йўқлиги сабаб, она-бола дадаси ишлаб келгунича кутадиган бўлиб, уйларига қайтишди.

Қизалоқ учун вақт тўхтаб қолгандек эди. Ахийри, айтилган маблағ жамғарилиб, ўша магазинга етиб келдилар.

— Қайси қўғирчоқни айтаяпсиз. У аллақачон сотилиб кетди. Бошқасини танлай қолинг…

Бошқаси эса қизалоққа ёқмасди. Икковлон сувга тушган мусичадек, ахийри ўша қизил боғли туфлини олиш учун бозорга йўл олдилар. Қизалоқ ҳали у растадаги, ҳали бу растадаги бежирим қизил боғли туфлиларни кийиб кўраверганини кузатиб турган сотувчи аёл:

— Ойиси, қизингизга бошқа оёқ кийими кўрсангиз бўларди. Чунки, туфлини энг катта размерлиси ҳам қизалоққа кичиклик қилаяпти, —деди.

— Эҳ, қизим, сенга шу туфлини олиб беришни роса истагандим. Афсуски, иложимиз етганида, сен улғайиб қолибсан…

Сайёра АЛЛАЕВА

Бошқа маълумотни қидириб кўринг

Осойишталик посбонлари эҳтиёжманд 1000 оилага ўн турдаги озиқ-овқат маҳсулоти етказиб бермоқда

Сурхондарё вилояти ички ишлар идоралари ходимлари Президентимиз томонидан илгари сурилган “Саховат ва кўмак” умумхалқ ҳаракатини …

Fikr bildirish

Email manzilingiz chop etilmaydi. Majburiy bandlar * bilan belgilangan