Эътироф

Ҳар бир касб соҳиби дунёга ўз нигоҳи билан қарайди ва у ёки бу масалани ўз қаричи билан ўлчайди. Яна бир гапки, ҳар қандай газета ёки журналнинг савияси уни бошқараётган муҳаррир савиясидан юқори бўлмайди. Бу исбот талаб қилмайдиган ҳақиқат. Босма нашрларнинг савияси, мавзулар ранг-баранглиги, таҳрирнинг сиқиқлиги, жумлаларнинг равонлиги, мантиқнинг узвийлиги, бугунги кун талаби нуқтаи назаридан мавзуга ёндошиш ва ўқувчидан бир қадам олға юриш, бу биринчи навбатда муҳаррирнинг, сўнг ўша жамоада ишлаётган ижодкорларнинг касбига бўлган садоқати ва савиясига боғлиқ.

Нега гапни бундай бошладик? “Сурхон ёшлари“ газетаси чиқа бошлаганига кўп вақт бўлган эмас. Лекин, нафақат воҳада, балки бутун республикада оз бўлса-да ўз ўқувчисини топишга улгурди. Агар газета саҳифаларини кўздан кечирсангиз, республикамизнинг турли бурчакларида ижод қилаётган эл ардоғидаги шоир, ёзувчилар, олимлар, тадбиркорлар ҳақида бир талай маълумотга эга бўласиз. Шунинг учун ҳам бу газета таҳририяти бир неча бор Ўзбекистон мустақил босма оммавий ахборот воситалари ва ахборот агентликларини қўллаб-қувватлаш ва ривожлантириш жамоат фондининг грантига сазовор бўлганлиги бежизга эмас.

Яқинда яна бир қувончли воқеанинг гувоҳи бўлдим. Ўзбекистон мустақил босма оммавий ахборот воситалари ва ахборот агентликларини қўллаб-қувватлаш ва ривожлантириш жамоат фонди томонидан Тошкентдаги “City Palace” меҳмонхонасининг анжуманлар залида “Жамият ва мен“, “Инсон ҳуқуқлари – журналист нигоҳида“ республика кўрик-танлови ғолибларининг тақдирлаш маросими бўлиб ўтди. Унда ҳамкасбимиз, “Сурхон ёшлари“ газетаси бош муҳаррири И. Шомиров “Инсон ҳуқуқлари – журналист нигоҳида“ танловида биринчи ўринга лойиқ деб топилди.

Мукофот ва биринчи даражали дипломни Олий Мажлис Қонунчилик палатаси демократик институтлар, нодавлат ташкилотлар ва фуқароларнинг ўзини ўзи бошқариш органлари қўмитаси раиси Акмал Саидов топширди. Энг муҳими, ҳамксабимиз томонидан ўтган йил давомида ёзилган танқидий, таҳлилий руҳдаги мақолалари нуфузли ҳакамлар ҳайъати томонидан юқори баҳоланганлигининг ўзи жуда катта эътирофдир. Биз ҳамкасбимиз, шоир ва журналист Исроил Шомировни ушбу ютуги билан астойдил табриклаб, келгусидаги ижодий ишларига юксак парвозлар тилаймиз!

Сафар ОМОН

Бошқа маълумотни қидириб кўринг

Газетанинг янги сонини ўқинг!

“Сурхон тонги” газетасининг 2020 йил 5 августдаги сонида сиз кутган мақолалар нашр этилган: — “Тез …

Fikr bildirish

Email manzilingiz chop etilmaydi. Majburiy bandlar * bilan belgilangan